АКШ Иранга каршы санкцияларды жеңилдетпей турганын билдирди

АКШнын мамлекеттик катчысы Марко Рубио Иран уранды байытууну токтотуп, колундагы байытылган уран запастарынан баш тартмайынча, Вашингтон бардык санкцияларды толук көлөмдө сактап каларын билдирди. Бул тууралуу чет элдик басылмалар жазышты.

Өкүлдөр палатасындагы угууларда сүйлөгөн Рубионун айтымында, Тегеран өзөктүк программасы боюнча талаптарды аткармайынча, санкциялар боюнча эч кандай жеңилдик берилбейт.

Ошол эле учурда Иран парламентинин улуттук коопсуздук жана тышкы саясат комитетинин төрагасы Эбрахим Азизи май айынын соңунда Иран менен АКШнын ортосундагы сүйлөшүүлөрдө байытылган уранды өлкөдөн чыгаруу маселеси күн тартибинде жок экенин билдирген.

АКШ менен Ирандын ортосунда өзөктүк программа боюнча пикир келишпестиктер уланып, тараптар негизги маселелер боюнча азырынча орток чечимге келе элек.