Кытайда каратэ көрсөткөн робот баланы тээп жиберди

Кытайдын Синьцзян аймагындагы туристтик жайлардын биринде робот баланы кокусунан буту менен тээп жиберген. Бул окуянын видеосун чет элдик басылмалар жарыялашты.

Видеодон робот каратэ кыймылдарын көрсөтүп жатып, жанында турган баланы тепкенин көрүүгө болот. Соккудан кийин бала курсагын кармап ыйлап жиберген.

Баланын апасы окуя боюнча полицияга кайрылганын билдирген. Анын айтымында, робот парк администрациясынын көзөмөлүндө болгонуна карабастан парктын кызматкерлери кырдаалга дароо көңүл бурган эмес.

Окуянын видеосу социалдык тармактарга тарап, колдонуучулар роботтордун коопсуздугун талкуулашууда. Аларды адамдардын, өзгөчө балдардын жанында колдонууда сактык чараларын күчөтүү керектигин белгилешүүдө.