Испания курамасы Дүйнө чемпиондугунун алдында Ламин Ямал боюнча чечим кабыл алды

Испаниянын улуттук курамасынын жана Барселонанын чабуулчусу Ламин Ямал 2026-жылдагы Дүйнө чемпиондугу башталар алдында команда менен толук кандуу машыгууларга кайтып келди. Бул тууралуу чет элдик басылмалар жазышты.

Маалыматка ылайык, 18 жаштагы футболчу АКШнын Теннесси штатындагы Чаттануга шаарында өткөн машыгууга толук катышып, өнөктөштөрү менен бирге даярдык көрдү.

Ямал сезон соңунда сол бутунун сан булчуңунан жаракат алып, калыбына келүү процессинен өтүп жаткан. Испания курамасынын жана Барселонанын медициналык штабдары оюнчунун ден соолугун көзөмөлдөп, жаракаттын кайталанышына жол бербөөгө аракет кылышкан.

Испания курамасынын техникалык директору Аитор Каранка футболчунун кайтып келүү мөөнөтү боюнча клуб менен өзүнчө келишим болбогонун белгиледи.

Анын айтымында, негизги максат – оюнчунун ден соолугун сактоо жана талаага кайтуу үчүн эң ылайыктуу учурду аныктоо болгон.

Ошондой эле жалпы топ менен Нико Уильямс дагы машыгууга кошулду. Ал эми Виктор Муньос өзүнчө калыбына келүү программасын улантууда.

Испания курамасы Дүйнө чемпиондугундагы алгачкы оюнун 15-июнда Кабо-Вердеге каршы өткөрөт.