Кыргызстан менен Грузия спорт тармагындагы кызматташтыкты кеңейтет

Кыргызстан менен Грузия спорт тармагындагы кызматташтыкты жаңы деңгээлге чыгарууга багытталган меморандумга кол коюшту. Бул тууралуу Дене тарбия жана спорт мамлекеттик агенттигинен билдиришти.

Маалыматка ылайык, документке Садыр Жапаров менен Ираклий Кобахидзе жүргүзгөн сүйлөшүүлөрдүн жыйынтыгында, Грузия өкмөт башчысынын Кыргызстанга расмий сапарынын алкагында кол коюлду.

Меморандум Кыргызстандын Дене тарбия жана спорт мамлекеттик агенттиги менен Грузиянын Спорт министрлигинин ортосундагы өз ара аракеттенүүнү күчөтүүгө багытталган. Анын алкагында тажрыйба алмашуу, спортчулар менен машыктыруучуларды даярдоо, ошондой эле эл аралык мелдештерге катышуу боюнча кызматташтык кеңейтилет.

Тараптар бул келишим эки өлкөнүн достук мамилелерин бекемдеп, спорт тармагындагы өнөктөштүктү өнүктүрүүгө өбөлгө болорун белгилешти.