АКШдагы тарыхый беттештин алдында кыргызстандыктар Өзбекстанга колдоо көрсөтүүдө

АКШда өтүп жаткан футбол боюнча Дүйнө чемпиондугунда Өзбекстандын улуттук курама командасын тарыхый беттеш күтүп турат. Экинчи турдун алкагында өзбек футболчулары дүйнөлүк гранддардын бири болгон Португалия менен күч сынашат.

Бул маанилүү оюн алдында Америкадагы кыргыз күйөрмандары боордош элге кызуу колдоо көрсөтүүдө. Айрыкча Хьюстон шаарында Кыргызстандын жана Өзбекстандын желектери катар желбиреп, эки элдин ынтымагы дагы бир жолу айгинеленди. Кыргыз күйөрмандары өзбек курамасына колдоо көрсөтүп, беттеш алдында өзгөчө майрамдык маанай жаратууда.

Дүйнө чемпиондугу–2026 мелдешине КМШ өлкөлөрүнүн ичинен жалгыз Өзбекстан жолдомо алган. Бул жетишкендик өзбек футболу үчүн гана эмес, жалпы Борбор Азия спорту үчүн тарыхый окуя катары бааланууда.

Социалдык тармактарда жана күйөрмандар арасында да Өзбекстандын дүйнөлүк аренадагы оюну аймак үчүн чоң сыймык экени айтылууда. Португалия менен боло турган беттеш курч атаандаштыкка жана унутулгус эмоцияларга бай болору күтүлүүдө.