Бишкекте эл аралык бокс кечеси өттү

Бишкектеги "Жаштык Арена" спорттук комплексинде эл аралык профессионалдык бокс кечеси болуп өттү.

Кыргызстандын профессионалдык бокс тарыхындагы эң ири эл аралык мелдештердин бири болуп саналган турнирге Кыргызстан, Казакстан, Өзбекстан, Тажикстан, Орусия, Таиланд жана Кубанын мушкерлери катышты.

Анда Ыктыяр Нышанов орусиялык Михаил Тарханов менен Жогорку Кеңештин төрагасынын атайын куру үчүн күч сынашып, жеңип алса, Акжол Сулайманбек уулу таиланддык Пайом Кампи менен Кыргызстандын профессионалдык бокс лигасынын чемпиондук куру үчүн беттешип, утуп чыкты.

Кечеге ардактуу конок катары дүйнөлүк бокстун легендалары, абсолюттук дүйнө чемпиону Эвандер Холифилд жана Олимпиада чемпиону Александр Поветкин күбө болушту. Ошондой эле парламент төрагасынын орун басары Болот Ибрагимов баштаган депутаттар күйөрмандык кылышты.