Аргентина Египетти жеңип, Дүйнө чемпиондугунун чейрек финалына чыкты

2026-жылкы футбол боюнча Дүйнө чемпиондугунун 1/8 финалында Аргентина курамасы Египетти 3:2 эсебинде жеңди.

АКШнын Атланта шаарындагы "Мерседес-Бенц Стэдиум" аренасында өткөн беттеште эсепти күтүүсүздөн Египет ачты. 15-мүнөттө коргоочу Яссер Ибрахим гол киргизди. Аргентина жооп катары мүмкүнчүлүк алды - бирок Лионель Месси пенальтиден пайдалана алган жок.

Экинчи таймда Египет артыкчылыгын көбөйттү. 67-мүнөттө Мостафа Зико экинчи голду киргизди. Буга чейин анын дагы бир голу VAR системи аркылуу каралып, эреже бузуу үчүн эсепке алынган эмес.

Бирок Аргентина оюн аягында укмуштуудай кайтып келди. 79-мүнөттө Кристиан Ромеро эсепти кыскартса, төрт мүнөттөн кийин Лионель Месси тең эсепти орнотту. Ал эми 90+3-мүнөттө Энцо Фернандес жеңиш голун киргизип, аргентиналыктарга 3:2 эсебинде жеңиш алып келди.

Эми Аргентина Дүйнө чемпиондугунун чейрек финалында Швейцария - Колумбия беттешинин жеңүүчүсү менен ойнойт.