Жуд Беллингем ким? Реалдын жылдызы тууралуу кызыктуу фактылар

Жуд Беллингем - англиялык футболчу, Испаниянын «Реал Мадрид» клубунда жана Англиянын улуттук курама командасында жарым коргоочу болуп ойнойт. Буга чейин «Бирмингем Сити» жана Германиянын «Боруссия Дортмунд» клубдарында ойногон.

Балалыгы, ата-энеси жана карьерасынын башталышы

Жуд Беллингем 2003-жылдын 29-июнунда Англиянын Уэст-Мидлендс аймагындагы Стоурбридж шаарында Марк жана Дениз Беллингемдин үй-бүлөсүндө төрөлгөн. Атасы ирландиялык, апасы кениялык тектен. Марк Беллингем полиция кызматкери болуп иштеп, ошол эле учурда сүйүүчүлөр деңгээлинде ийгиликтүү футбол ойноп, карьерасында 700дөн ашуун гол киргизген.

Ата-энеси уулунун футболдук карьерасын башынан эле колдоп келишкен. Кийинчерээк Марк Беллингем ФИФАнын агенттик лицензиясын алып, уулунун каржылык кеңешчиси болуп иштей баштаган. Ал эми Дениз Беллингем футболчунун медиа жана коомчулук менен байланыш иштерин жүргүзөт.

Жуддун иниси Жоб Беллингем дагы профессионал футболчу. Ал дагы «Бирмингем Сити» академиясынын тарбиялануучусу болуп, кийин «Сандерленд» клубунда ойногон. 2025-жылдын июнь айында болсо Германиянын «Боруссия Дортмунд» клубуна өткөн.

Жуд Беллингем футболду бала кезинен тарта ойной баштаган. Алгач «Стоурбридж» балдар командасында машыгып, сегиз жашында «Бирмингем Ситинин» академиясына кабыл алынган.

Балалык кумирлери катары Уэйн Руни, Стивен Жеррард жана Зинедин Зиданды атаган. Беллингемдин айтымында, атасы Зидандын жасалма футболкасын дайыма кийип жүрчү. Бир күнү ал атасынан: «Бул ким?» деп сураганда, атасы «YouTube’дан көр» деп жооп берген. Ошондон кийин ал Зидандын оюндарын тынымсыз көрүп, аны өзүнө үлгү кылган. 2022-жылы Чемпиондор лигасынын финалында Зидан менен жолугушуу анын бала кездеги кыялынын ишке ашышы болгон.

14 жашында Беллингем «Бирмингемдин» 18 жашка чейинки командасында, 15 жашында болсо 23 жашка чейинки курамында ойной баштаган. 2018-жылдын 15-октябрында U23 курамындагы алгачкы беттешинде «Ноттингем Форестке» каршы оюнда экинчи таймда алмашууга чыгып, 87-мүнөттө жеңиш алып келген жалгыз голду киргизген.

2019-жылы белгилүү FourFourTwo журналы аны Англиянын эң келечектүү 50 жаш футболчусунун катарына кошкон.

Жуд Беллингемдин профессионалдык карьерасы

Чоң футболдогу дебюту

2019-жылдын июль айында Беллингем «Барселона», «Бавария» жана «Манчестер Сити» сыяктуу ири клубдардын кызыгуусуна карабастан, «Бирмингем Сити» менен эки жылдык келишим түзгөн.

Ал Португалиядагы сезон алдындагы машыгууларда мыкты оюн көрсөтүп, көп өтпөй негизги курамда дебют жасаган. Бул 2019-жылдын 6-августунда Англия Лига кубогунун «Портсмутка» каршы беттешинде болгон. Ошондо ал 16 жаш 38 күнүндө «Бирмингем Ситинин» тарыхындагы эң жаш дебютант болуп калган.

Ал эми 31-августта «Сток Ситиге» каршы оюнда гол киргизип, клубдун тарыхындагы эң жаш гол автору деген дагы бир рекордду жаңылаган.

Ошол сезондо Жуд Беллингем «Бирмингем Сити» үчүн жалпы 44 оюн өткөрүп, 4 гол киргизген. Команда Англиянын Чемпионшип лигасында 20-орунду ээлеп, төмөнкү дивизионго түшүп калуу коркунучунда калган. Алар түшүп калуу аймагынан болгону эки упайга жогору жайгашкан. Ал эми Беллингем Англиянын Футбол лигасы тарабынан сезондун эң мыкты жаш оюнчусу деп табылган.

«Боруссия Дортмунд»

2020-жылдын жай айларында «Челси», «Манчестер Юнайтед», «Бавария» жана «Боруссия Дортмунд» Беллингемди өз катарына кошуу үчүн атаандашкан.

Белгилүү болгондой, Беллингем «Бирмингемден» кетери анык болгондо, клуб жетекчилиги анын 22-номердүү футболкасын түбөлүккө колдонууга чыгарбай койгон. Forbes басылмасынын маалыматына ылайык, Беллингем жаштар келишиминин мөөнөтү бүткөндөн кийин клубдан акысыз кетүүгө укуктуу болгон. Бирок ал туулуп-өскөн клубунун каржылык абалын жакшыртуу үчүн толук кандуу трансфер аркылуу кетүүнү өзү талап кылган.

2020/21-сезондо Беллингем Германиянын «Боруссия Дортмунд» клубуна өткөн. Sky Sports маалымдагандай, трансфердин суммасы 25 миллион фунт стерлингди түзүп, ал учурда Беллингем тарыхтагы эң кымбат 17 жаштагы футболчу болгон.

Өз тандоосун ал мындайча түшүндүргөн:

«Бул клуб жаш оюнчуларды өнүктүрүү менен белгилүү. Локдаун учурунда ойлонууга жетиштүү убактым болду. Германия чемпионаты Англияга караганда эртерээк башталгандыктан, команданын оюндарын көрүүгө мүмкүнчүлүк алдым. Мен “Боруссияга” кандай пайда алып келе аларымды жана клуб мени кандай деңгээлге чыгара аларын түшүндүм».

Беллингем 2020-жылдын сентябрында «Боруссия» үчүн дебют жасап, кыска убакытта команданын негизги оюнчуларынын бири болуп калды. Биринчи сезонунда бардык мелдештерде 46 оюн өткөрүп, 4 гол киргизген. Ошондой эле командага Чемпиондор лигасынын чейрек финалына чыгууга жардам берген. «Лациого» каршы оюнда (17 жаш) Чемпиондор лигасында негизги курамда чыккан эң жаш англиялык болуп тарыхка кирген.

2021-жылдын 13-майында Беллингем чоңдор арасындагы алгачкы титулун жеңип алган. Германия Кубогунун финалында «Боруссия» «Лейпцигди» 4:1 эсебинде жеңген. Ошол эле жылы France Football басылмасынын 21 жашка чейинки мыкты оюнчуга берилүүчү Kopa Trophy сыйлыгында экинчи орунду ээлеп, жеңишти «Барселонанын» оюнчусу Педри алган.

Кийинки сезондо Беллингем 44 беттеш өткөрүп, 6 гол жана 14 голдук пас берген. «Боруссия» Германиянын Суперкубогунда «Бавариядан» 1:3 эсебинде утулуп, Бундеслигада экинчи орунду алган. Чемпиондор лигасынын тайпалык баскычынан чыга албай, кийин Европа лигасынын плей-оффунда «Рейнджерске» жеңилген. Беллингем Golden Boy сыйлыгына көрсөтүлүп, бирок кайрадан Педриге утулган.

2022/23-сезондо Беллингем 42 оюнда 14 гол киргизип, 7 голдук пас берген. 1-октябрда «Кёльнго» каршы оюнда ал биринчи жолу «Боруссиянын» капитаны болуп чыгып, клуб тарыхындагы эң жаш капитан болгон. Үч күндөн кийин «Севильяга» каршы Чемпиондор лигасынын оюнунда турнир тарыхындагы гол киргизген эң жаш капитан болуп калган (19 жаш).

Ошол сезондо «Боруссия» кайрадан Бундеслигада экинчи орунду ээлеп, Чемпиондор лигасынын 1/8 финалында мелдештен чыккан. Беллингем Бундеслиганын сезондогу эң мыкты оюнчусу деп табылып, кийин Kopa Trophy жана Golden Boy сыйлыктарын жеңип алган. Ошондой эле «Алтын топ» добуш берүүсүндө 18-орунду ээлеген.

Жалпысынан Беллингем «Боруссия» үчүн 132 оюн өткөрүп, 24 гол жана 25 голдук пас менен айырмаланган.

«Реал Мадрид»

2023-жылдын 7-июнунда «Боруссия» Беллингем трансфердик терезе ачылгандан кийин «Реал Мадридге» өтөрүн жарыялаган. Англиялык оюнчу жаңы клуб менен алты жылдык келишим түзүп, трансфердин суммасы 127 миллион еврону түзгөн.

Ал оюндук номер катары №5ти тандаганын Зинедин Зиданга болгон урмат-сыйы менен түшүндүргөн.

Беллингем жаңы клубдагы алгачкы төрт оюнунда эле беш гол киргизген. Буга чейин мындай көрсөткүчкө «Реалдын» тарыхында болгону Криштиану Роналду жана Пепильо жетишкен. 2023-жылдын августунда ал Ла Лигада айдын эң мыкты оюнчусу деп табылган алгачкы англиялык футболчу болгон.

2023/24-сезондо Беллингем 42 оюнда 23 гол жана 13 голдук пас берген. «Реал» Испания чемпионатын, Испаниянын Суперкубогун жана Чемпиондор лигасын жеңип алган. Чемпиондор лигасынын финалында мурдагы клубу «Боруссияны» 2:0 эсебинде утуп, Беллингем голдук пас менен айырмаланган.

Ошол сезондун жыйынтыгында ал Ла Лиганын эң мыкты оюнчусу, Чемпиондор лигасынын эң мыкты жаш оюнчусу деп табылып, «Алтын топ» добуш берүүсүндө үчүнчү орунду, ал эми ФИФАнын жылдын мыкты оюнчусу добуш берүүсүндө дагы үчүнчү орунду ээлеген.

2024/25-сезондо Беллингемдин көрсөткүчү бир аз төмөндөп, 58 оюнда 15 гол жана 15 ассист жасаган. «Реал» УЕФАнын Суперкубогун жана Континенттер аралык кубокту утса да, Ла Лигада экинчи орунду ээлеп, Чемпиондор лигасынын чейрек финалында мелдештен чыккан.

2025-жылдын жайында Беллингем ийниндеги көптөн берки жаракатынан улам операция болуп, сезондун башын өткөрүп жиберген. Натыйжада «Реал» бир дагы титул уткан эмес: Ла Лигада экинчи орунду ээлеп, Испания Суперкубогунун финалында «Барселонага» 2:3 эсебинде утулган, Испания Кубогунда 1/16 финалда «Альбасетеге» жеңилип калган жана Чемпиондор лигасынын чейрек финалында «Баварияга» жол берген. Беллингем бул сезондо 40 оюн өткөрүп, 8 гол жана 5 ассист менен чектелген.

Англиянын улуттук курамасы

Беллингем Англиянын курама командаларынын бардык жаш курактарында ойногон. 2020-жылдын сентябрында ал Англиянын 21 жашка чейинки курамында дебют жасаган эң жаш оюнчу болуп, алгачкы оюнунда эле гол киргизген.

Ошол эле жылы 17 жашында Англиянын негизги курама командасында дебют жасап, улуттук команданын тарыхындагы үчүнчү эң жаш дебютант болгон.

Ал Евро-2020нын курамына кирип, Англиянын ири турнирде ойногон эң жаш футболчусу болуп калган. Англия финалга чейин жетип, Италияга пенальтилер сериясында утулган.

Беллингем курамадагы алгачкы голун 2022-жылдагы дүйнө чемпионатында Иранга каршы оюнда (6:2) киргизген. Англия ошол мелдештин чейрек финалында Францияга 1:2 эсебинде жеңилген.

Евро-2024тө Англия кайрадан финалга чыгып, бул жолу Испаниядан 1:2 эсебинде утулган. Беллингем бардык жети оюнга катышып, Сербия менен Словакиянын дарбазасына гол киргизип, финалда дагы голдук пас берген.

Турнир учурунда ал Словакияга каршы оюндан кийин одоно жаңсоо көрсөткөнү үчүн 30 миң евро айыпка жыгылып, бир оюнга шарттуу түрдө четтетилген.

Беллингем 2026-жылдагы дүйнө чемпионатына дагы чакырылып, Европадан төрт ири эл аралык мелдешке катышкан эң жаш футболчу болгон. Ганага каршы оюнда ал улуттук курамдагы 50-оюнун өткөрүп, бул көрсөткүчкө эң жаш жеткен англиялык болуп калды. Панама менен беттеште гол жана голдук пас менен айырмаланган.

1/8 финалда Мексиканын дарбазасына эки гол киргизсе, чейрек финалда Норвегияга каршы дагы дубль жасап, Англиянын жарым финалга чыгышына чоң салым кошкон.

Жеке жашоосу жана кирешеси

2024-жылдан бери Беллингем америкалык модель жана инфлюенсер Эшлин Кастро менен мамиледе. Ал футболчудан алты жаш улуу.

Беллингем тамак жасай албасын айтып, көбүнчө клубдун базасында же Мадридге өзү менен кошо көчүп келген апасы даярдаган тамактарды жей турганын билдирген.

2026-жылы Sportico басылмасы анын жылдык кирешесин 44 миллион доллар деп баалаган.

Футболдон тышкаркы ишмердүүлүгү

2024-жылдын май айында Беллингем Lucozade спорттук суусундуктар бренди менен узак мөөнөттүү келишим түзгөн.

Ошол эле жылдын июнь айында ал Ким Кардашьянга таандык Skims брендинин жарнамалык кампаниясына катышкан. Ошондой эле Adidas, Louis Vuitton жана McDonald’s менен демөөрчүлүк келишимдери бар.

«Реалга» өткөндө Беллингем өзүнүн имидждик укуктарынын 100 пайызын өзүндө калтыруу боюнча клуб менен макулдашкан. Натыйжада ал талаадан тышкаркы жарнамалык келишимдерден жылына болжол менен 15 миллион доллар табат.

Беллингем EA Sports FC 25 жана EA Sports FC 26 видеоюндарынын башкы жүзү болуп чыккан. 2024-жылдын сентябрында ал YouTube каналын ачып, «Реалдагы» алгачкы сезону тууралуу даректүү тасманы жарыялаган.

2026-жылдын апрель айында Беллингем Улуу Британиядагы The Hundred крикет лигасында ойногон «Бирмингем Феникс» клубунун азчылык үлүшүн сатып алган.