Никарагуанын президенти: “Өлкөдө мындан ары шайлоо болбойт”

Никарагуанын президенти Даниэль Ортега өлкөдө мындан ары шайлоо өткөрүлбөй турганын билдирген. Бул тууралуу чет элдик басылмалар жазды.

Анын айтымында, оппозициялык саясий күчтөр шайлоо аркылуу бийликти басып алууга аракет кылып жатат.

“Бул тууралуу унутушсун! Бул жерде мындан ары шайлоо болбойт. Алар шайлоо аркылуу өкмөттү жана бийликти басып ала алышпайт”,- деди Ортега Сандинисттик революциянын 47 жылдыгына арналган иш-чарада.

Президент өкмөт парламент жана тиешелүү мекемелер менен биргеликте айрым саясий күчтөргө чектөө киргизе турган мыйзамдарды даярдай турганын айтты. Анын сөзүнө караганда, бул мыйзамдар “мамлекеттик төңкөрүш уюштурууга аракет кылгандарга жана АКШ тарабынан колдоого алынган мекенге чыккынчылык кылгандарга бөгөт коюшу керек”.

Буга чейин Никарагуадагы кезектеги жалпы шайлоо 2027-жылдын ноябрь айына пландалган. Бирок Ортега жаңы чаралар шайлоону толугу менен жокко чыгарабы же айрым партиялардын катышуусун гана чектейби - тактаган жок.