Грузияда блэкаут: Өлкөнүн дээрлик бардык аймагында электр жарыгы өчтү

Жумага караган түнү Грузиянын дээрлик бардык аймагында электр энергиясы үзгүлтүккө учурады. Бул тууралуу жергиликтүү 1TV телеканалы билдиргенин чет элдик басылмалар жазышты.

Маалыматка ылайык, өлкөнүн көпчүлүк бөлүгү, анын ичинде борбор калаа Тбилиси да жарыксыз калган. Электр энергиясынын өчүшү Батумиде, Гурия, Самегрело, Рача жана Душети аймактарында да катталган. Тбилисинин борборунда жол чырактары менен көчө жарыктары иштебей калган.

Азырынча масштабдуу авариянын себеби расмий түрдө айтыла элек. Жергиликтүү басылмалардын маалыматына караганда, электр станцияларынын биринде авария болушу мүмкүн.

Грузиянын Мамлекеттик электр системасынын басма сөз кызматы түнкү саат 00:10 чамасында өлкө боюнча электр энергиясы өчүп калганын билдирип, учурда калыбына келтирүү иштери жүрүп жатканын маалымдады.

Учурда Мцхета-Мтианети аймагында жана Тбилисинин көпчүлүк бөлүгүндө электр энергиясы жарым-жартылай калыбына келтирилди. Бийлик өкүлдөрү электр энергиясын берүү этап-этабы менен жакынкы убакытта толугу менен калыбына келтирилерин билдиришти.