Жеки Чандын канча жаныбары бар?

Жеки Чанды дүйнө жүзү актёр, каскадёр жана мушташ өнөрүнүн чебери катары билет. Ошол эле кезде анын жаныбарларга болгон өзгөчө мамилеси да көпчүлүктүн көңүлүн буруп келет.

Анын үйүндө азыркы учурда 3 ити жана 2 мышыгы, ал эми иш кеңсесинде дагы 5 мышыгы бар экени айтылат. Буга чейин Жеки Чандын JJ жана Jones аттуу голден-ретриверлери өзгөчө белгилүү болгон. Мындан сырткары, актёрдун жылкылары да бар.

2009-жылы Жеки Чан Кытайдын Чэнду шаарынын панда боюнча элчиси болуп дайындалып, 2 панданы камкордукка алган. Аларга Чэн Чэн жана Лонг Лонг деген ысымдарды берген. Актёрдун пандаларга болгон өзгөчө мамилеси 2017-жылы "Оскар" сыйлыгынын аземинде да байкалган. Ал кызыл килемге 2 оюнчук панда менен чыгып, аларды өзү камкордукка алган пандалардын символу катары көрсөткөн. Бул көрүнүш ошол учурда көпчүлүктүн көңүлүн бурган.

Ошентип, актёрдун жаныбарлар дүйнөсүндө ит-мышыктардан тартып пандаларга чейин бар экенин билдик. Ал эми жаныбарларды коргоо боюнча билдирүүлөрүндө Жеки Чан кароосуз калган жаныбарларды сатып алуунун ордуна багып алууга чакырып келет.