19 секундда жеңишке жеткен кыргыз мушкер Дана Уайтты таң калтырды (видео)

Кыргызстандык мушкер Акбар Абдуллаев UFC президенти Дана Уайттын талапкерлер сериясындагы беттешинде бразилиялык Эднилсон Сантос менен күч сынашып, атаандашын 19 секундда нокаутка учуратты.

Бул жеңиштен кийин Абдуллаевдин профессионалдык рекорду 14-0 болду. Мушкер 14 беттешинин баарын мөөнөтүнөн мурда аяктаган.

Сантос бул беттешке UFC'нин мурдагы эки салмактагы чемпиону Алекс Перейранын командасы менен чыккан. Бразилиялык мушкер жаракат алган америкалык Энтони Фигуэроаны алмаштырган.

Абдуллаевдин жеңишинен кийин UFC президенти Дана Уайт анын көрсөткүчүнө жогору баа берип, мушкерди шоу тарыхындагы "эң чоң таланттардын бири" деп атады.

Эми 28 жаштагы кыргызстандык мушкер карьерасын UFC'де улантат.

Эскерте кетсек, 28 жаштагы Акбар Абдуллаев Ош облусунун Мады айылында төрөлгөн. Ал 3-4 жашында үй-бүлөсү менен Орусияга көчүп кеткен. Ал жактан муай-тай жана кикбоксинг менен машыккан.