Алматыда Чыңгыз Айтматовго арналган маданий борбор ачылып, бюсту орнотулду

Казакстандын Алматы шаарындагы "Туран" университетинде залкар жазуучу Чыңгыз Айтматовдун ысымын алып жүргөн маданий борбор жана анын бюсту ачылды. Бул тууралуу бүгүн, 14-ноябрда Маданият министрлиги билдирди.

Маалыматка ылайык, долбоор Кыргызстандын Алматы шаарындагы башкы консулу Жеңишбек Асанкуловдун демилгеси менен, "Туран" университетинин ректору Рахман Алшан уулунун колдоосу аркылуу ишке ашырылды. Аны уюштурууга Алматыдагы мекендештер да салым кошушту.

Ачылыш аземинде Кыргыз улуттук "Манас" театрынын директору Нурбек Талантбеков бюсттун автору, скульптор Надырбек Жээренчиевге, маданият, маалымат жана жаштар саясаты министри Мирбек Мамбеталиевдин куттуктоосун жеткирип, министрликтин сыйлыгын тапшырды.

Чыңгыз Айтматов атындагы жаңы маданий борбордун ачылышы кыргыз элинин руханий жана адабий мурастарын чет өлкөлөрдө жайылтууда, кыргыз-казак маданий байланыштарын чыңдоодо жана улуу жазуучунун чыгармачылыгын жаш муундарга таанытууга багытталган.