Балбылдаган көздөрүң арбады,
Балдай ширин сүйүүнү арнады.
Бакытым деп жүрөгүм тандады,
Бир сени, жаным.
Бапестеп жашайын сени ар дайым,
Балапаным, мендик болчу, айым.
Байлап алды күлгөнүң жайдары,
Сендик мен, жаным.

Кайырма:
Жалжалым, мага, жаным керексиң,
Жараткан берген, жаным, белексиң.
Жашоомо жарык чачып келесиң,
Жанып белесиң.

Жаркыраган жылдызым, аппагым,
Жамалың сулуу таңдын атканы.
Жаныңда кантип күндүн батканын,
Сезбеймин, жаным.
Жароокерим, кайдан сага кабылдым?
Жалгызымды издеп бүгүн таптым.
Жан дүйнөмдүн чырагын жандырдың,
Сүйүүнүн, жаным.

Кайырма:
Жалжалым, мага, жаным, керексиң,
Жараткан берген, жаным, белексиң.
Жашоомо жарык чачып келесиң,
Жанып белесиң.

Сырымды айткым келип жүрөт өзүңдү сүйдүм деп,
Жолукканда сыр бербей неге жылмайдың эркелеп?
Жаркыраса маанайың мага, бактылуумун анда,
Келчи, сүйгөнүм, кел жымыңдап махабат таңында,
Чын сүйүүнүн шаңына.

Кайырма:
Бактылуумун жанымда
Өзүң болсоң дайым.
Махабат таңында,
Сүйүүмдү айтайын.
Жүрөктөгү сүйүүмдү,
Обон кошкон сөзүмдү,
Ырымды арнайын.

Гүл терип сага келем бүгүн, тосолу кадыр түн,
Сырыбыздын айтылбай келген чечели түйүнүн.
Махабаттын майрамын тосуп, дайым бирге болуп,
Кызыгына баталы өмүрдүн, сүйүүбүз өчпөсүн,
Түбөлүккө гүлдөсүн…

Кайырма:

Ак көйнөк, кызыл көйнөк, жашыл көйнөк,
Кыздар ай, жүрөгүм от кетет ойноп.
Ойлонтуп кызгалдактай кылыгыңар,
Кыялым Ала-Тоону кетти бойлоп.

Кайырма:
Кыздар ай, эшигиңде көпкө күттүм,
Үшүдүм жамгыр жааган түндө калдым.
Ышкырдым терезеңер күйүп турду,
Укпадыңар күйүп- жандым.

Кыздарга арналат да ушул ырым,
Айтайын жүрөктөгү болгон сырым.
Санаага салып мени койдуңарбы,
Черткилеп өйдө-төмөн жүрөк кылын.

Турамын тоодой болгон ойду толгоп,
Кыздар ай, койдуңарбы бизди ойлоп.
Жылмайып сарсанаага салдыңарбы,
Ойлорум аккан сууну кетти бойлоп.

Ээрчишип экөөбүз жаздагы таңда,
Чачтарың сеңселип жазгы шамалга.
Жылмайган жүзүңдөн жылдыз жанганда,
Сага ашык болгонумду ыйлап эңседим.
Сенден алыс жалгыздыктан азап тартканда,
Майда, майда басканыңды ыйлап эстедим.

Кайырма:
Эстедим, эстедим
Сагынып сени эстедим.
Эстедим, эстедим
Сагынып сени эстедим.

Күн өтүп, ай өтүп, алмашты жылдар,
Жылдардын арасында кайгы-муңу бар.
Ортобузга нөшөрлөп жааган аппак кар,
Жазды эңсеп ыйлаарыңды жаным эстедим.
Кусалыкта жанчыламын сыздап муңкана
Башкага жар болгонуңду ыйлап эстедим.

Кайырма:

Элестеп ар дайым ошол сезимди,
От болуп удургуйт назик көңүлдө.
Жүрөктө айыкпаган арман, кайгылар,
Ал бактылуу күндөрүмдү сыздап эстедим.
Сынды сүйүү күзгүлөрү, сынды махабат,
Жараланган жүрөгүмдү тыңшап эстедим.

Кайырма:

Өмүрүмдүн ар бир ирмемин,
Өйдө-төмөн калчап иргедим.
Гүл талаада калып издерим,
Мен бактымды издедим.

Тагдырымдын ашып белесин,
Багынтам деп сезим сересин.
Ай талаада калып издерим,
Мен бактымды издедим.

Жашоо чиркин кантип жайнасын,
Таба албасак анын айласын.
Баркы чексиз биздин бактыбыз,
Айтчы деги кайдасың?
Махабаттан жанып дүрт этип,
Кеткен эмес деги ким келип,
Ошолордой болуп жер кезип,
Биз бакытты издедик.

Тынчтык бербей тунук бир сезим,
Жаштыгымды кайра иргедим.
Медер туткан бактым кайдасың,
Мен өзүңдү издедим.

Көкөй кескен көңүл суз болуп,
Көкүрөктөн кезейт бир жерим.
Баркы чексиз бактым кайдасың?
Мен өзүңдү издедим.

Биз көлдө сүзгөн, бир өмүр сүргөн,
Кош ак куу болдук тандашып сүйгөн.
Эңсеген жылдыз экөөбүз болдук,
Ээрчишип учуп, жандашып түшкөн.

Кайырма:
Кызыл гүл болуп ачылам сага,
Кымбатың болуп арналам сага.
Шүүдүрүм болуп таң менен келсең,
Кучагым жайып күн болом сага,
Өмүрдү жалгыз арнаймын сага.

Каректе калсын махабат жанып,
Кайталап өчпөс сезимди жазып.
Түбөлүк биздин сүйүүбүз өчпөйт,
Алоолоп күйүп, албырып жанып.

Кайырма:

Айылдашым сулуу Айганыш,
Ай, жылдыздай көктө жайнаңыз.
Башка айылга ыраа көрө албай,
Баарыбыздын кетти айлабыз.

Кайырма:
Сулуу, сулуу, сулуу Айганыш,
Жаш жүрөгүм сага байланыш.
Адат болду күндө кечинде,
Айганыштын үйүн айланыш.

Таш ыргытсам такыр тоготпой,
Кирешеңер такыр жолотпой.
Апаң чыгат сенин ордуңа,
Чоң таягын кармап колуна.

Басамын деп үйүң айланып,
Байкеңе да калдым кармалып.
Огородго сууга келдим деп,
Алдап койдум аны жайгарып.