Төрт эмдин апасы: “Балдардын аттарын алмаштырып албайлы деп ар биринин керебеттерине ысымдарын жазып койдук”

Бүгүн, 21-апрелде SUPER.KG порталынын чыгармачыл тобу Бишкекте төрт эм эркек балалуу болгон үй-бүлөгө конокко барып кайтты. Белгилүү болгондой, учурда Алмазбек, Асылбек, Кубанычбек жана Камчыбек 200 граммдан салмак кошуп, ден соолуктары жакшы. 4 эм менен катар дагы 3 уулду тарбиялап жаткан эне бир кезде боюнан алдырууну ойлогонун, азыр балдардын кучагында өзүн бактылуу сезип жатканын айтып берди.   

"ЭНЕ СҮТҮМ 4 БАЛАМДЫ ТОЙГУЗГАНГА ЖЕТПЕЙ ЖАТАТ"

Балдардын энеси Гүлайым Абдылдаеванын айтымында, төрт эмдин экөөсү бир тондон чыккандыктан, бири-бирине куюп койгондой окшош, ал эми калган эки наристе айырмаланып турат. Ата-эне балдардын аттарын алмаштырып албоо үчүн ар биринин керебеттеринин тушуна ысымдарын жазып коюшкан. Гүлайым Абдылдаева: “Менин сүтүм төртөөнө тең жетпей, аларга кошумча азыктардан берип жатабыз. Эң кичинекей болуп төрөлгөн Кубанычбекти көбүрөөк эмизем. Балдарым курсагы ток, асты таза болсо күлүп-жайнап калышат”,- дейт. 

4 ЭМДИН ТӨРӨЛҮШҮ МЕНЕН ҮЙ-БҮЛӨДӨ 7 УУЛ БОЛДУ 

Балдардын атасы Нурлан Зарнаев уулдары төрөлгөн күндү эч качан унутпай турганын айтат: “Мындай бакыт ар бир наристе күткөн ата-энеге буюрсун дейм. Кээде ишене албай кетебиз. Качан балдарыбыздын жанына келип жыпар жытына мас болгондо “бакыт деген ушу тура” деп калабыз. Жубайымдын аман-эсен көз жарып алганына медкызматкерлерге абдан ыраазыбыз”.

“Төрт эм төрөгөндөр биздин тукумда болгон эмес”,- деп сөзүн улантты Нурлан мырза. “Бирок жубайым тарапта эгиз төрөгөндөр болгон, анын таенеси, апасы экиден эгиз төрөшкөн, ал өзү да эгиздин түгөйү”,- дейт ал. Ал эми учурда Нурлан менен Гүлайымдын төрт эмден башка дагы 3-2-класста окуган Нурсултан, Эрбол жана 1 жаштан ашкан Элхан аттуу уулдары бар. Жылмайып, шайыр отурган Эрбол апасына чоң жардамчы болуп калганын айтып берди: “Апам чарчабасын деп үй жыйнайбыз, катуу шоктонбойбуз. Бөбөктөрүбүздү терметебиз. Инилерим чоңоюп калса, аларга окуганды үйрөтөм”.

"9 АЙ МУРУН БОЮМА БҮТКӨНДӨ ДОКТУРГА БАРЫП, БОЮМДАН АЛДЫРАМ ДЕГЕМ"

“9 ай мурун боюма бүткөндө ооруканага алдырам деп баргам. Себеби Элхан аттуу уулумду операция жолу менен төрөгөнүмө 6 айдын гана жүзү болгон. Албетте, мындай учурда кайра бойго бүтүү өтө кооптуу болгон. Бирок УЗИден эгиз балдар экенин айтышканда апам менен кеңешип, “Кудайдын бергени экен” деп кайра төрөөнү чечтим. Башында дарыгерлер эки бала дешкен, кийин үчөө экен деп, акыркы жолу барганда төрт эм эркек көтөрүп жүрөсүң деп сүйүнтүштү. Кудайга шүгүр, балдарымды 9 ай көтөрүп, аман-эсен көз жарып алдым. Эми дагы кыздуу болобуз деген үмүтүм чоң”,- деди Гүлайым Абдылдаева.    

"ӨКМӨТ ҮЙ МАСЕЛЕСИН ЧЕЧИП БЕРЕБИЗ ДЕП ЖАТАТ"

Тилекке каршы, 7 кичинекей баласы бар бул жаш үй-бүлөнүн үйү жок. Алар азыр туугандарынын үйүндө жашап жатышат. "Өзүбүздүн ысык суусу бар, жылуу үйүбүз болсо деп эңсейбиз. Президентибиз да бизге көңүл буруп, учурда үй маселесин чечип беребиз деп турушат. Өзүм куруучу болуп иштейм, бирок акыркы кезде жумушка барбай калдым. Жубайыма каралашып үйдө болуп жатам",- деди Нурлан Зарнаев.

Урматтуу окурмандар, бул макаланын видеоверсиясын "Супер ТВдан" жакынкы аралыкта көрө аласыздар.