"Дарбыздын ичи кан сыяктуу болуп, колго кармасаң майдаланып кетпей, чоюлчаак экен" дейт Ош шаарындагы базардан дарбыз сатып алган тургун

Ош шаарындагы базардан сатып алган дарбыздын ичи кыпкызыл кан сыяктуу болуп, кармап көрсөк чоюлчаак болуп жатат деген шаар тургуну Кутман Султанов SUPER.KG порталына буларды айтып берди.

Анын айтымында, дарбызды 22-июнда шаардагы базарлардан Тажикстандын дарбызы деп 3 даана сатып алган.

"Ичи кыпкызыл болуп тургандыктан даамдуу көрүнүп, үчтү сатып алгам. Үйгө келип кессек эле ичи башкача кызыл экен. Жеп көрсөк даамы жок, анан кармап көрсөк майдаланып кетпей, чоюлчаак. Мыкчып көрсөм желим сыяктуу. Анан дагы ал жактагы дарбыздардын баарынын формалары бирдей болчу. Эртеси үйдө бузулбай турган 1 дарбызды мага саткан сатуучуга алып барсам, дарбыздарды сатып бүтүп, кетип калышкан экен. Бирок өзүм тийиштүү жерлерге кайрылган жокмун", - деди Султанов.

Буга чейин Өзбек жана Тажик өлкөлөрүнөн алынып келген дарбыз жана коондордо нитраттын өлчөмү көп экени айтылган. Мамлекеттик ветеринардык жана фитосанитардык инспекциянын жетекчиси Калыс Жумакановдун Айыл чарба, тамак-аш өнөр жайы жана мелиорация министрлигине жөнөткөн каты жарыяланган.