Өкмөт башчы мамлекеттик чек араны кайтаруу жана коргоону күчөтүүнү тапшырды

Премьер-министр Мухаммедкалый Абылгазиев мамлекеттик чек араны кайтаруу жана коргоону күчөтүүнү тапшырды. Бул тууралуу өкмөттүн басма сөз кызматынан билдиришти.

Маалыматка ылайык, Мухаммедкалый Абылгазиев өлкөнүн күч түзүмдөрүнө Баткен облусунда болуп өткөн окуяга байланыштуу Кыргыз-Тажик тилкесинде мамлекеттик чек араны кайтарууну жана коргоону күчөтүү тапшырмасын берди. Анда укук коргоо органдарына аймакты туруктуу кайтарууну жүргүзүү жана чектеш аймактардагы жарандардын коопсуздугун камсыздоо жана окуянын чыңалышына жол бербөө үчүн чаралардын бардык топтомун ишке ашырууну тапшырды.

Муну менен катар өкмөт башчы кырдаалды тез арада жөнгө салуyну жана чыңалууну толук жоюу үчүн вице-премьер-министр Жеңиш Разаковго эки өлкөнүн тиешелүү мамлекеттик органдарынын, ошондой эле облус жетекчилеринин ортосундагы сүйлөшүү процессин күчөтүүнү тапшырды. Ошондой эле Мухаммедкалый Абылгазиев Кыргыз-Тажик мамлекеттик чек арасын делимитациялоо жана демаркациялоо маселеси боюнча ишти илгерилетүүгө чейин кандайдыр бир чагымчылдыкка алдырбоо жана кырдаалдын курчушуна алып келбөө үчүн чараларды кабыл алуу керектигин өзгөчө баса белгиледи.