Саламаттыкты сактоо министри өлкөдө грипптен каза болгон адамдардын санын билбей турганын айтты

Коронавируска байланыштуу жыйында SUPER.KG порталы Саламаттыкты сактоо министри Космосбек Чолпонбаевге төмөнкүдөй суроо узатты.

"Кытайдан чыккан коронавируска байланыштуу алдын алуу иш-чаралары жүргүзүлүп жатканын айттыңыз. Мындан улам эмне үчүн бизде сасык тумоо эпидемиясы болгондо мындай чаралар көрүлбөйт. Анткени вирус сасык тумоого окшош экени айтылууда. Негизи өлкөдө жылына сасык тумоодон канча адам көз жумат? Бул сан статистикада барбы?"

Аталган суроого министр так жооп бере алган жок. Айтымында, бул тууралуу статистика бар, бирок ал аны жанына алып келген эмес.

"Сасык тумоо боюнча менде азыр так маалымат жок. Негизи коронавирус бул жаңы вирус. Буга окшош бизде куш тумоосу сыяктуулар болуп келген. Дүйнө жүзүндө негизи сасык тумоодон коронавируска салыштырмалуу көп өлүмдөр катталат. Өзүнчө келсеңиз жеке маалымат беребиз", - деди ал.