Өлкөгө киргизилген өзгөчө кырдаал эрежесинин шарттары тууралуу биринчи вице-премьер Кубатбек Боронов түшүндүрмө берди

Бүгүн, 21-мартта Кыргыз Республикасынын Өкмөт үйүндө Кыргыз Республикасынын биринчи вице-премьер-министри Кубатбек Бороновдун катышуусунда өлкө аймагына өзгөчө кырдаал режимин киргизүү тууралуу онлайн брифинг өттү.

"22-марттан тартып Кыргыз өлкөсүндө өзгөчө кырдаал режими киргизилет. Өзгөчө кырдаал биологиялык-социалдык кырдаал болуп саналат. Бул эпидемия, ага байланыштуу карантиндер киргизилет. Учурда коронавирус жуктурган жарандар жашаган аймактар карантинде турат. Өзгөчө кырдаал режими өлкө аймагына киргенде өзгөчө тартиптер болот. Карантин болгон аймактан сыртка чыкпоо, өздүк гигиенаны сактоо, турак жайларды дезинфекциялоо, санитардык эрежелерди аткаруу талаптары коюлат. Жарандардын бир жерден экинчи жерге баруусу кыскартылат. Бул коронавирусту жайылтпоого кылган аракеттин негизинде чыккан чечим. Ушундан улам шаар ичиндеги коомдук транспортту кыскартууга аракет кылабыз. Ушул эрежелердин негизинде жарандар жашоо шарттарын түзүп алуусу зарыл. Кырдаалга байланыштуу ар бир мамлекеттик орган өзүнө жүктөлгөн милдетти аткарат", - дейт Боронов.