+439. Эң жогорку көрсөткүч! Акыркы сутка ичинде коронавирус жуктуруп алгандардын 370и Бишкек менен Чүйдөн

Сутка ичинде өлкөдө 439 жарандын анализинен коронавирус илдети бар экени аныкталды. Муну менен республика ичинде ооругандардын саны 5 миң 735ке жетти. Маалыматты саламаттыкты сактоо министринин орун басары Мадамин Каратаев бүгүн, 1-июлда брифинг учурунда айтты.

Бишкек шаары – 195;
Чүй облусу – 175;
Ош шаары – 5;
Ош облусу – 5;
Нарын облусу – 10;
Жалал-Абад облусу – 24;
Талас облусу – 12;
Баткен облусу – 13.

Жаңы катталган 439 адамдын ичинен 4 бейтап сыртан келген, калган 435и тастыкталган учурлар менен байланышта болгондор.

Стационарда – 750; алардын ичинен жандандыруу бөлүмүндө – 19; үй карантининде дарыланып жаткандар – 2 миң 480.

Акыркы сутка ичинде жүргүзүлгөн изилдөөлөр – 3 миң 281ди түздү, COVID-19 лабораториялык тастыкталган оорулуулар менен байланышта болгон жактардын саны – 21 миң 145 адам (бул көрсөткүч эпидемиологиялык изилдөөлөрдүн жүрүшүндө өзгөрүшү ыктымал).

Буга чейин өлкөдөгү коронавирус боюнча эң жогорку көрсөткүч 27-июнда катталган эле. Анда 309 адам илдет жуктуруп алганы аныкталган. Бүгүнкү статистика андан 130 кишиге көптүк кылат.

Белгилей кетсек кечээ, 30-июнда Ош шаарында жана Ош облусунда 1ден гана коронавирус жуктуруп алган бейтап катталган. Буга аталган аймакта ПЦР-анализди жүргүзүүгө керектүү каражаттар жок болуп жатканы себеп болгон. 30-июнга чейин Ош шаарында жана Ош облусунда сутка ичинде вирус жуктуруп алгандардын саны көп болуп жаткан.