Жол кырсыктары Кыргызстанга жылына 372 миллион доллар чыгым алып келет

Жол-транспорт кырсыктары Кыргызстанга жыл сайын болжол менен 372 миллион доллар чыгым алып келет. Бул тууралуу БУУнун башкы катчысынын жол коопсуздугу боюнча атайын өкүлү Жан Тодт БУУнун жаңылыктар кызматына берген маегинде билдирди.

Уюмдун маалыматына ылайык, өлкөдө жол кырсыгынан каза болгондордун 40 пайызы - жөө жүргүнчүлөр, ал эми жабыркагандардын дээрлик 22 пайызы - 18 жашка чейинки балдар.

"Кыргызстанда өзгөрүүлөргө жетишүүгө олуттуу даярдыкты көрдүм", - деген Жан Тодт.

Ал жол коопсуздугун жакшыртуу үчүн ылдамдыкты көзөмөлдөө, коопсуздук курун тагынуу, туулга колдонуу жана мас абалда унаа башкарууга каршы чараларды күчөтүү зарыл экенин белгиледи.