Брижит Бардонун жеке буюмдары аукциондо дээрлик 1 миллион еврого сатылды

The Guardian гезитинин маалыматы боюнча, француз актрисасы Брижит Бардонун жеке буюмдары кечээ, 21-сентябрда Париждеги аукциондо дээрлик 1 миллион еврого (1,15 миллион доллар) сатылды.

Аукционго актрисанын Сен-Тропе жана Париждеги үйлөрүндөгү 285 буюм, анын ичинде кийим-кече, аксессуарлар, эмеректер, автопортреттер жана музыкалык аспаптар коюлган. Уюштуруучулардын айтымында, буюмдардын болжолдуу баасы 50 миң еврону (57 миң 500 доллар) түзгөн.

Аукциондон түшкөн каражат Бардо негиздеген жаныбарларды коргоо фондуна, ошондой эле анын уулу Николас-Жак Шарьеге берилет.

Бардонун күйөөсү Бернард д'Ормале аукционду сынга алып, аны актрисанын элесине урмат көрсөтпөө деп атаган. Ал AFP агенттигине берген маегинде актрисанын жеке буюмдары анын мүлкүнүн бир бөлүгү катары сакталышы керек болчу деп айтып, "Бардо бул сатууга макул болмок эмес" деп кошумчалаган.

Бардо 2025-жылдын декабрь айында 91 жашында каза болгон.