Эксперт АКШ эмне үчүн Сауд Арабиясына аскердик жардам бере албай жатканын түшүндүрдү

АКШ Сауд Арабиясын колдойт, бирок азырынча аскердик жардам көрсөтүүгө мүмкүнчүлүгү чектелүү. Бул тууралуу Кент университетинин саясат таануу профессору Ричард Саква РИА Новости агенттигине билдирди.

Анын айтымында, буга АКШнын ракеталар жана башка курал-жарактар боюнча запасынын азайышы себеп болууда.

“АКШ Сауд Арабиясын колдойт, бирок аскердик жактан эмес. Алардын курал-жарагы жетишсиз. Ракеталары түгөнүп, “Томагавк” ракеталары жана башка куралдары өтө аз калды. Алардын бир бөлүгү Украинага берилген”, — деди эксперт.

Саква белгилегендей, Иран менен болгон куралдуу кагылышуулар жана Израилге курал-жарак жеткирүү да АКШнын ракеталык запастарынын азайышына таасир эткен.

Анын пикиринде, эгер Вашингтондо керектүү курал-жарак жетиштүү болгондо, Йемендеги хуситтерге каршы сокку урууга мүмкүнчүлүгү болмок.