Кыргызстанда Беларусь тракторлорун чыгаруучу завод куруу пландалууда

Өлкөдө Беларусь тракторлорун жыйноо жана өндүрүүчү завод куруу маселеси каралууда. Бул тууралуу бүгүн, 11-ноябрда Айыл чарба министрлиги билдирди.

Маалыматка ылайык, бул маселе 9-ноябрда айыл чарба министри Эрлист Акунбековдун Беларуска болгон сапарында Минск трактор заводунда каралган.

Эрлист Акунбеков Кыргызстанда машина-трактор паркын жаңылоо жана дыйкандарды жеткиликтүү техника менен камсыздоо артыкчылыктуу багыт экенин белгилеп, жергиликтүү өндүрүш техниканын өздүк наркын жана жеткирүү чыгымдарын төмөндөтүүгө шарт түзөрүн айтты.

Акыркы 5 жылда лизинг аркылуу дыйкандарга 36,8 миллиард сомдук 13 миңден ашык айыл чарба техникасы берилген.

Мындан тышкары, "Белнефтехим" концерни жана "Ждановичи" агрокомбинаты менен кызматташуу маселелери талкууланган.

Ошондой эле кечээ, 10-ноябрда өткөн Кыргызстандын жана Беларустун аймактар аралык биринчи форумунун жыйынтыгында соода-экономикалык, илимий-техникалык жана маданий кызматташтыкты камтыган 6 документке кол коюлган.