Бишкектеги Ак-Ордонун тургундары суукта электр энергиясы берилбей жатканын айтып, Ак үйдүн алдына кайрадан чогулушту

Ак-Ордо конушунун жашоочулары президент Алмазбек Атамбаевге электр энергиясын тартып берүү талабын коюп бүгүн, 21-ноябрда Ак үйдүн алдына чогулушту. Чогулгандардын саны болжол менен 300гө жетет. Тургундар өздөрүнүн өкмөткө болгон нааразылыгын билдиришти.

"Баламдын кичүүсү 3тө, улуусу 1-класста окуйт. Тапшырмаларын күндүз аткарат, кээде түндө окуганга туура келет. Өкмөт элди ойлобой калды", - дейт бир жылдан бери электр энергиясы жок жашаган Аида Жаныбек кызы.

"Мен да бир жылдан бери электр энергиясыз жашайм. 3 балам бар. Күн суук болуп жатат, кыйналдык", - дейт Ак-Ордонун тургуну Гүлжан Шаршеналиева.

Эскерте кетсек, аталган конуштун жашоочулары буга чейин да өкмөткө кайрылып келишкен.

Азырынча чогулгандарга бийлик өкүлдөрүнөн бири да чыга элек. Митингдин жүрүшүн 10дон ашуун милиция кызматкерлери көзөмөлдөп жатышат.