Борбордук "Ала-Тоо" аянтында Жаңы жылды 10 миңге жакын адам тосту (фото)

31-декабрда Бишкектеги борбордук "Ала-Тоо" аянтында майрамдык театрлаштырылган концерт саат 20:00дө башталып, ага 10 миңдей адам күбө болду. Шаар тургундарына жана конокторуна кыргыз эстрада жылдыздары өз өнөрлөрүн тартуулап, каалоо-тилектерин айтып жатышты. Андан тышкары элдик эс алуулар өткөрүлүп, Жаңы жылды тосууга келгендер бийиктиги 29 метр болгон балатынын жанында Аяз ата, Аяз кыз жана келе жаткан Тоок жылдын ээси менен сүрөткө түшүп жатышты.

Быйыл башка жылдарга салыштырмалуу "Ала-Тоо" аянтындагы эс алуучулардын коопсуздугу өзгөчө көзөмөлгө алынды. Маалыматтарга таянсак, 1500дөй милиция кызматкери аянтты курчоого алып, ар бир келген конокту текшерип киргизип жатышты. Курчоого алынган аймакка алкоголдук ичимдиктер жана пиротехникалык заттар киргизилген жок.

Майрамдык программа аяктаган соң фейерверк аттырылды. Андан соң милиция кызматкерлери аянтты кайрадан элден бошотуп, "Тазалык" ишканасынын кызматкерлерине өткөрүп беришти.