Ишкерлер: "Өлкөдөн бир адамдар тарабынан ири суммада акча чыгарылып кетти деген калп маалымат бизнеске терс таасирин берип жатат"

Бүгүн, 3-июнда "Дордой", "Кара-Суу", "Мадина" соода базарларынын өкүлдөрү журналисттерге маалымат жыйын өткөрүштү. Анда буга чейин өлкөдөн ири суммадагы акча чыгарылып кеткен деп жарыяланган маалыматтын алардын ишмердүүлүгүнө тийгизген таасирине токтолушту.

Юрист Муса Бейшенов бүгүнкү маалымат жыйынга келгендер аталган базарларда иштеген миңдеген жарандардын кызыкчылыгы үчүн аракет кылып жатышканын айтты. Өткөн аптада "Азаттыкка" "Кыргызстандан чыгарылган миллиондордун изи" деп аталган иликтөө жарыяланган. Андан кийин Экономикалык кылмыштуулукка каршы күрөшүү кызматынын жетекчиси Бакир Таиров аталган акчалар "Дордой", "Кара-Суу" жана "Мадина" базарларындагы соодагерлердин товар алып келүү үчүн жиберген акчасы экендигин белгилеген.

"Интернетке, жалпыга маалымдоо каражаттарына өлкөдөн миллиондогон доллар акчалар чыгарылып кетти делген фейк, такталбаган малыматтар тарап кетти. Өлкөдө соода-сатык тармагында эмгектенген ишкерлер биргелешип Кытайга товар үчүн акча жөнөтүшөт. Ал жактан буюртманы алгандар товар салышат. Бул мыйзамга каршы келген иш эмес, алардын бул акчалары банк аркылуу которулуп турат. Бир жыл ичинде Кыргыз өлкөсү менен Кытайдын ортосундагы товар жүгүртүүнүн суммасы миллиард долларга жетет, товарга жөнөтүлгөн акча менен өлкөдөн чыгарылган дегендин айырмасы бар да", - деген Бейшенов жогоруда аталган иликтөөнү так эмес деп, коомчулуктун башын айландырууда деген пикирин кошумчалады.

Ал мындай маалыматтар чакан жана орто бизнеске терс таасирин тийгизе турганын белгилеп, кытай ишкерлеринин ишеничи кетсе, өлкөдөгү миңдеген соодагерлер жумушсуз калат деген жүйөнү келтирди.

Буга көрсөтүүнүн автору макул эмес экенин билдирип, "фейк маалымат деген сөздү эмненин негизинде айтып жатасыңар" деген суроосун узатты. Ишкерлер так жооп бербегени менен иликтөөдө айтылган ишканага да, анда аты аталган Кытайга акча жөнөтүп турган делген адам Айэркен Саймаитиге да тиешебиз жок деп жооп беришти.

"Биздин "Абдыраз" ишканасына да, Саймаитиге да тиешебиз жок. Болгону мындай маалыматтар тарагандан кийин текшерүү, кысым күчөйт. Бул ишкерлердин аракетине тоскоолдук жаратат. Ошондуктан мындай маалыматтарды таратууда кылдат бололу деген ойдо гана маалымат жыйын өткөрүп жатабыз", - деген ишкерлер журналисттердин өлкөдөн чыгарылган делген акчалар тууралуу жана башка суроолоруна Саймаити өзү келип жооп берсин дешти.