Баңгизат менен алектенген топтун мүчөлөрү кармалышты  

Баңгизаттарды мыйзамсыз ташуу жана сатуу менен алектенген кылмыштуу топтун мүчөлөрү кармалышты. Бул тууралуу Ички иштер министрлиги билдирди.

Маалыматка ылайык, 33 жаштагы жаран айдап бара жаткан Toyota Camry үлгүсүндөгү унааны текшерүүдө 28 килограмм 666 грамм болгон марихуана баңгизаты табылган. Ишти андан ары тергөөдө 32, 33 жана 40 жаштагы жарандар колго тушүшкөн.

Шектүүлөрдүн Нарындын Жумгал районундагы үйлөрүнө тинтүүлөр жүргүзүлүп, жалпы салмагы 482 грамм болгон марихуана баңгизаты, ошондой эле баңгизаттарды даярдоодо колдонулган шаймандар, тагыраагы, марли, газ баллону, газ конфоркасы жана ар түрдүү идиштер табылган.

Аталган факт боюнча Кылмыш-жаза кодексинин 282-беренеси (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) менен кылмыш иши козголгон. Учурда кылмышка тиешеси бар башка адамдарды аныктоо иштери жүрүүдө.